iffaɣ d yan usnflul asklan i umara amaziɣ, d umdyaz, « lmsɛudi muḥmmad », ila s uzwl « taydrt n uswingm », s tutlayt n tamaziɣt, tg zɣ tiẓṛigin n tzlɣa n tirra n imaratn s tmaziɣt ɣ usggʷas n 2019.
tg tmzgunt ad asnflul asklan wis sin dar umara, ig udlis n tmzgunt amṛwaṣu, isman udlis 90 n talɣa, ma ittggan 45 n tnfult, ilin t gis snat tmzgunin n wazzann, ttyarant s uskkil n tfinnaɣ d uskkil n tlatinit.
idlisn lli yura umara amaziɣ « lmsɛudi muḥmmad » :
- adlis n tmdyazin - amwan n wawal - iffɣ d ɣ usggʷas n 2013, yumẓ tasmɣurt n tbadut tis snat n usnflul n tskla n iɛrrimn. isman kigan n tmdyazin isawaln f kṛaḍ wantimn : tamagit - tudrt - tayri.
- adlis n tullisin timaziɣin igzzuln - ixf n ungi - d iffɣ nn ɣ usggʷas n 2021, issufɣ t id usinag agldan n tussna tamaziɣt, isman 18 n tullist tamaziɣt bḍant awal f kigan n untimn imaynutn.
tawlaft n udmawn n udlis tẓli tnt tzlɣa n tirra n imaratn s tmaziɣt, tg i udm amzwaru aklu amllal ɣ llan kṛaḍ ijjign n tafukt, d yan ugḍiḍ, yili f udm amzwaru n udlis assaɣ n umara d tamatart n tzlɣa n tirra, ittyura fllas uzwl n tmzgunt s uskkil n tfinaɣ d uskkil alatini. ɣ udm wis sin, iṭṭf aklu azggʷaɣ, tili fllas tawlaft n umara, d twwuriwin nns tisnflulin, ili gis awd atig n udlis igan 30 n drhm.
- asktur n udlis :
- talɣa 1 assaɣ n umara, d assaɣ n tzlɣa n tirra, d uzwl n tamzgunt, awd dépôt légal. d isbn, d usggʷas n usufɣ 2019. d tadrawt lli t id issufɣn.
- talɣa 3 iga gis umara tarzzift i sin wazzann mi irzzf timzgunin.
- zɣ talɣa 4 ar talɣa 5 : yura gisn t umara tamzwarut n udlis, isawl gis f tẓuṛi d tskla n umzgun d watig dars illan ɣ tɣrma n ufgan, ifk yat tannayt f iẓuṛan n umzgun ɣ wakal n tmazɣa.
- zɣ talɣa 6 ar 24 : yura gisn t umara yat tmzgunt n umẓyan ilan azwl n « tamdlut n twwargit » tamzgunt ad trur taɣḍft n umẓyan s tzdugi, ḥma ad issann atig n tudrt d watig n tzdgi gis illan, ɣ ugns n iḍṛiṣn n tmzgunt llan kra n izlan n wazzan.
- zɣ 25 ar 45 : tamzgunt tis snat, tla azwl n « masin dtgmumt mafimal », isawln f yan uḥnjar amẓyan lli mi yiws mafimal allig iḥlm tiɣri lliɣ tt inn ikka ur iḥml tinml d islmadn nns, d ngr iḍṛiṣn n tmzgunt ann, llan kra izlan n umẓyan.
snat tmzgunin ad fkan t i tskla tamaziɣt (taskla n umẓyan) yat tɣarast tamaynut ɣ tirra, ira zɣ gisn t umara a iml i wazzan amaziɣ tannayt nns f tzdgi d tɣri, irarn as taɣḍft f kra n iskkinn lli ur ssnn illan addur.
amara « muḥmmad lmsɛudi », ilul ɣ usggʷas n 1991 ɣ tmnaḍt n tmzgadiwin tasga n cicawa, g udwwaṛ n umdiɣr, iɣra tasusyulujit ɣ tsdawit g ugadir, ifk anzgum nns i tussna tamaziɣt d tutlayt nns, yara kigan n idlisn, yumẓn mnnawt tsmɣurin tinamurin, zɣ gisn tamzgunt n « taydrt n uswingm », lli yumẓn tasmɣurt n tskla tamaziɣt n usinag agldan n tussna tamaziɣt, ɣ usggʷas n 2020, ɣ anaw n tskla n umẓyan.
